Jharkhand ki 15th State Senior Swimming Championship ka conclusion Monday ko Jamshedpur ke JRD Tata Sports Complex mein hua. Is championship ka aayojan East Singhbhum District Swimming Association ne kiya tha, jahan rajya bhar ke swimmers ne shandaar performance dikhayi.
Host East Singhbhum ne competition mein poori tarah dabdaba banaye rakha aur men & women dono teams championships apne naam ki.
Men’s category mein East Singhbhum ki team ne 184 points ke saath first place secure kiya, jabki Ranchi 63 points ke saath runner-up rahi. Women’s category mein bhi East Singhbhum ne 123 points ke saath championship jeeti, jabki Ranchi 48 points ke saath second place par rahi.
Jamshedpur ke Dipanshu Singh ko championship mein 35 points hasil karne ke baad men’s category ka Best Swimmer announce kiya gaya. Women’s category mein Richa Sahu ne 28 points ke saath Best Swimmer ka title apne naam kiya.
Officials ne bataya ki is championship mein swimmers ke perormance ko upcoming Senior National Swimming Championship ke liye Jharkhand team ke selection mein dhyan mein rakha jayega. Yeh National competition 18 June se Ahmedabad mein start hoga.
Prize distribution ceremony mein Tata Steel ke Chief of Corporate Services Varun Bajaj chief guest ke roop mein maujood rahe. Is avsar par Tata Steel ke Chief Sports Mukul Vinayak Choudhari, Jharkhand Swimming Association ki President Barkha Sinha, secretary Upendra Tiwari, Shailendra Tiwari, K. Prabhakar Rao, former international swimmer Rambalak Singh aur Firoz Khan bhi present the.
