Mangaluru ke Saatvik Nayak Sujir ne National Open Water Swimming Championship mein apna first gold medal jeet liya, aur Karnataka ke liye medal tally mein ek aur medal jod diya.
Swimming Federation of India ke under me Karnataka Swimming Association dwara Tannirbhavi Beach par aayojit Men’s 7.5 km Group 2 event mein Saatvik ne fellow Karnataka swimmer Kishan S.V. ke saath ak close contest me unko pichhe chhodte huye ye title jeeta. Saatvik ne race 1 ghanta 51 minute 6 second mein complete ki, aur Kishan se 8 second aage finish kiya.
Karnataka ne men’s 5 km open category teeno medals apne naam karte huye poori tarah dominate kiya. Pawan Dhananjaya ne gold jeeta, jabki Renukacharya aur Dhyan Balakrishnan ne respectively silver aur bronze hasil kiye. Girls’ 3 km Group 4 event mein, Bengaluru ki Idika Bhatt ne gold jeeta aur Mangaluru ki Devika M. ne silver jeet kar Karnataka ko top two positions dilayi. State ne boys’ 3 km Group 4 event mein bhi silver aur bronze jeeta, aur girls’ 5 km open category mein bronze medal bhi jeeta.
Saatvik, jo Mangaluru ke St Aloysius College ka student hai, Vion Swimming Centre mein Lokaraj ke under training kar raha hai. Unke father, Dr. Nagendra Nayak, ne bataya ki yeh unke bete ka national open water swimming competition mein pehla appearance tha.
