Double Olympian Sajan Prakash 28 September se Ahmedabad ke Veer Savarkar Sports Complex, mein start hone wali Asian Aquatic Championship 2025 me ak major continenal stage par return kar rahe hain, unki nazar 200m butterfly par tiki hai.
Paris Olympics ke liye qualification miss karne aur sport se break lene ke baad, 31-year-old Sajan is saal dobara competition mein smoothly wapas aaye hain, aur ab unka aim apne signature event mein Asia ke best ke against 2-minute ke andar race complete karna hai.
Prakash ne maana ki Paris qualification miss hone se wo mentally aur physically drained ho gaye the. Unhone kaha, “Maine 20 saal se jada without proper break swimming ki, aur Paris ke liye cut miss karne ke baad main mentally burnt out ho gaya tha. Mujhe bas rest chahiye tha, apne shoulder ko treat karna tha aur thoda life enjoy karna tha. Us time pe maine coaching bhi explore ki. January se dobara start karne ke baad main dheere-dheere chal raha hun, but mujhe khushi hai ki main wapas competition mein hoon.”
Is saal ke starting mein, Prakash ne United States me organized 2025 World Police and Fire Games me apni class dikhai, jahan unhone 7 golds ke saath 10 medals jeete. Unhone Bhubaneswar mein huye Senior National Aquatic Championships mein bhi 4 medals jeete.
Asian Aquatic Championship mein Prakash 200m butterfly (jisme unhone do Olympic Games ke liye qualify kiya tha) ke saath 4x200m freestyle relay aur 4x100m medley relay mein bhi compete karenge. Unhone explain kiya, “Maine June ke Nationals mein 1:58.98 swim kiya tha, aur yahan mera goal 2 minutes ke andar karna hai. Yahi strategy hai aur agar main achieve kar paaya toh main khush rahunga.”
Aage ki sochte huye, Prakash ne kaha ki ye meet 2026 Asian Games ki taraf ak step bhi hai. Unhone bola, “Asian Games ak saal door hain. Ye ak achha mauka hai ye dekhne ka ki hum kahan khade hain aur humein kis cheez mein improve karna hai.”
Competition ke significance par baat karte huye, Prakash ne highlight kiya ki India mein championship host hona kitna important hai. Unhone kaha, “Asia ke fastest swimmers yahan hone wale hain, aur ye ak bahot hi fast meet hogi. Main 2016 edition ka part tha, aur 9 saal baad bhi race kar raha hoon ye mere liye proud moment hai. Ghar par host karne se Indian swimmers ko ak bada stage milta hai aur ye sport ka standard raise kar sakta hai. Hopefully ye next generation ko inspire karega.”
Naye venue par national camp ke dauraan training karne ke baad, Prakash ne infrastructure ki tareef ki. Unhone kaha, “Maine duniya ke kai bade pools mein training ki hai, lekin ye Asia ke best pools mein se ek hai. Ye fast lagta hai, dikhne mein bhi great hai, aur India mein bahot kam pools mein aisi facilities milti hain. Humein privileged feel hota hai yahan train aur compete karke.”
Prakash ne Indian swimming ki rising depth ki taraf bhi point kiya. Unhone add kiya, “Pahle raw talent toh tha, lekin facilities aur support ki kami thi. Ab better infrastructure aur financial backing ke saath youngsters iska poora fayda utha rahe hain. Ye dekhna exciting hai ki Indian swimming kahan ja rahi hai.”
Competition ke alawa, veteran Prakash Asian Aquatic Championship ke liye ak wider responsibility bhi dekhte hain. Unhone kaha, “Social media aur word of mouth ke through hum swimming ko sirf competitive sport ke roop mein nahi, balki health aur fitness ko promote karne ke liye bhi showcase kar rahe hain. Agar ye championship kuch youngsters ko swimming adopt karne ke liye inspire kare, toh ye ak badi success hogi.”
Indian Swimming News Or International Swimming News Padhne Ke Liye Facebook Par Swimswam Hindi Ko Like Karna Na Bhule:-SwimSwamHindi
