Aaj ke time mein ladkiyan sirf education field mein hi nahi, balki sports field mein bhi aage badh rahi hain. Aaj ki young ladkiyan padhai ke saath-saath alag-alag sports mein hissa le rahi hain aur local level se lekar state, national aur international level tak apna talent dikhakar safalta hasil kar rahi hain.
Parets bhi apni betiyon ko poora support de rahe hain, jiske chalte aaj kai ladkiyan athletics, kabaddi, kho-kho, cricket, volleyball, badminton, archery, swimming aur boxing jaise khelon mein participate kar safalta paa rahi hain. Kuch ladkiyan to alag-alag medals bhi jeet rahi hain.
Bhavnagar district ke Palitana taluka ke Moti Paniyali gaon ki talented swimmer Archanaba B. Wala ne state-level swimming competition mein ek hi din mein 2 bronze medals jeete hain.
Sports Authority of Gujarat ke dwara aayojit Khel Mahakumbh ke tahat state-level swimming competition Himmatnagar mein organize ki gayi thi, jismein poore state ke khiladiyon ne bade utsah ke saath bhaag liya tha.
Is competition mein Archanaba ne 100 meter freestyle aur 50 meter freestyle, dono alag-alag events mein shandaar performance diya aur dono mein bronze medal jeeta.
Dono competitions ek hi din mein hui thi, phir bhi Archanaba ne dhairya, self-confidence aur mazboot taiyari ke dam par yeh uplabdhi haasil ki.
Archanaba abhi Class 12 mein padhai kar rahi hain. Bachpan se hi unhe sports mein khaas dilchaspi thi. Unki safalta ke peeche unke coach Pritambhai Patel aur trainer Dipenbhai ki guidance bahot important rahi hai. Regular training, technical improvement aur mental preparation ke liye dono ne lagataar unhe guide kiya.
Archanaba daily 2se 3 ghante tak tough practice karti thi. Sirf school ke dinon mein hi nahi, balki vacation ke dauran bhi unhone apni practice jaari rakhi. Iske alawa, ab tak unhone kai local aur district level competitions mein compete kar certificate, trophies aur medals bhi jeete hain.
Moti Paniyali jaise rural area se aise talent ka saamne aana gaon aur poore ilaake ke liye garv ki baat hai. Aaj kal rural areas mein bhi sports ki importance badhti ja rahi hai.
Iske alawa Khel Mahakumbh jaise competitions se players ko achha protsahan mil raha hai, jisse woh local level se lekar international level tak safalta haasil kar rahe hain.
