Andhra Pradesh me doobne se hone wali maut kaafi badi chinta ka vishay ban gayi hai. Experts ka kehna hai ki iska ek bada reason bachchon aur yuvaon me survival swimming skills ki kami hai. State me har din lagbhag 4 se 6 log doobne se jaan gawa dete hain, aur jadatar victims youngsters hote hain.
Pichhle kuch saalon me Andhra Pradesh me har saal kareeb 1,400 se 1,600 log drowning ki wajah se mare hain. NCRB ke data ke mutabik 2017 se 2024 ke beech state me 12,479 log drowning incidents me mare. Inme se 90% se jada deaths water resources me galti se girne ya doosri wajah se hui hain.
Maximum drowning cases summer (April-May) aur winter picnic season (November-December) me hote hain, jab log nadiyon, talaabon, reservoirs aur beaches par jaate hain. Kai youngsters bina swimming jaane paani me utar jaate hain aur accidents ka shikaar ho jaate hain.
Haal hi me Kurnool district ke Mantralayam ke paas Tungabhadra River me paanch log nahaate waqt tez dhaar me beh gaye aur unki maut ho gayi. Police ka kehna hai ki kai log paani ke sroton ke khatron se anjaan hote hain aur basic swimming knowledge ke bina paani me chale jaate hain. World Health Organization (WHO) school-going bachchon ko swimming aur water safety training dene ki salah deta hai. Lekin Andhra Pradesh ke school curriculum me swimming shamil nahi hai. Kerala, Tamil Nadu aur Maharashtra jaise states ne kuch organizations ke saath milkar bachchon ko survival swimming training dene ki shuruaat ki hai. Experts ka maanna hai ki Andhra Pradesh me bhi aise programs start karne ki zarurat hai, kyunki drowning ek aisa khatra hai jise aksar nazarandaz kar diya jata hai aur bahut se youngsters ko swimming nahi aati.
