Arjuna awardee Bhanu Sachdeva ki awaaz ne Veer Savarkar Sports Complex ke aquatic center ko Wednesday ko goonj uthaya. Unhone 2025 Asian Aquatics Championships ke women’s 400m freestyle final ke dauraan chants lead kiye, jisme spectators ke saath-saath swimmers jaise Advait Page, Manvi Varma aur doosre bhi ek saath shamil huye. 4:26.89 seconds ke intense cheering ke baad, Bhanu aankhon mein aansu rokate hue apni seat par wapas baith gaye.
Unki beti, Bhavya Sachdeva continental championships mein medal jeetne wali first Indian woman bani. Unka bronze India ke total 13 medals mein se women’s category ka akela medal tha, jo ab tak ke unke sabse successful campaign ko darshata hai.
Ak Supportive Family
Jab Bhavya ko race ke baad unke father ke first reaction ke baare mein bataya gaya tab Bhavya ne media se khushi ke saath kaha “Wo [Bhanu] aur meri mom hamesha mere sabse bade supporters rahe hain.”
Unhone aage kaha, “Meri mom bhi ro rahi thi jab maine unhe medal jeetne ke baad call kiya. Dono hi mere sabse bade cheerleaders hain.”
Sachdeva parivaar ke liye ye aansoo ek tarah ki tasalli thi. Bhavya ne pehli baar sirf 4 saal ki umar mein pool mein dive liya tha. 3 saal baad unhone swimming ko professionally apnaya aur tab se compete kar rahi hain. Last year Bhavya apni mom aur chhoti behen ke saath Bangkok shift ho gayi. Parivaar ne Delhi chhod kar Bangkok ka rukh kiya taaki unki betiyon ko BEST Bangkok Swim Academy mein French coach Xavier Idoux ke guidance mein apne swimming dreams achieve karne ka mauka mil sake.
“Mujhe laga ki jis improvement ki mujhe jarurat hai, uske liye workout mein kuch changes karne padenge. Maine wahan [Bangkok] kaafi swimmers dekhe jo long-distance events mein kaafi achha kar rahe the, aur main bhi wahi change chah rahi thi taaki main kisi na kisi tarah se apni performance improve kar saku,”
Bhavya ne apna base shift karne ka reason batate huye kaha.
Jab unki wife aur betiyan doosre desh shift hui, Bhanu India mein apna business chalate rahe. Ye move, chahe mushkil tha, lekin ab lagta hai ki Sachdeva parivaar ke liye fruitful sabit ho raha hai. Bhavya ne 2025 National Games, Uttarakhand mein apne compete kiye gaye 5 individual events mein medals jeete aur phir 2025 National Swimming Championships mein 3 gold aur 1 silver medal jeetkar women’s 1500m freestyle mein 10 saal purana meet record break kiya.
2025 Asian Aquatics Championships mein bronze medal jeetna unke recent consistent performances ka sirf ek aur addition hai.
Fans Ki Favourite
Bhavya arena mein maujood young fans ke liye ek instant star ban gayi. Jaise hi unhone apna medal Bhanu ko dikhane ke liye spectator gallery mein kadam rakha, bachchon ka ek bada jhund unke aaspaas aa gaya, jo apni nayi hero se pictures aur autographs lene ke liye excited the.
“Mujhe lagta hai ki [crowd support] ne bhi farq dala,” Bhavya ne kaha. “Jab wo log ‘India’ aur phir aapka naam chillate hain, to aap aur jada pumped up feel karte hain aur race ke liye ready ho jaate hain. Mujhe lagta hai ki isne mujhe goosebumps de diye. Main pool deck par khadi thi, mera pair block par tha, aur poore goosebumps feel ho rahe the. Main feel kar rahi thi, ‘Oh, ab mujhe karna hi hai. Peeche hatne ka option nahi hai,’” unhone aage bataya.
Senior Sachdevas, jo khud bhi sportspersons hain, hamesha chahte the ki unki beti sports mein excel kare. Bachpan mein Bhavya ne tennis, skating, aur basketball jaise doosre sports try kiye – basketball ek aisa sport tha jo unki mom khelti thi. Lekin apne father ki tarah, unhone aakhirkar apni calling swimming mein hi paayi. Ye ek aisa sport tha jisme unhone isliye interest liya kyunki baaki sab sports “bahut sweaty” the.
Continental medal Bhavya ke liye sirf ek stepping stone hai ek bade goal ki taraf – apne aankhon mein aansu leke khade father ki tarah Arjuna awardee banna.
Arjuna award se sammanit hone wali last woman Shikha Tandon thi, jinhe 2005 mein sammanit kiya gaya tha. Majedar baat ye hai ki ye wahi saal tha jab Bhavya ka janm hua, aur unke father ne sport mein apni achievements ke liye uske 7 saal pehle award jeeta tha.
2025 Asian Aquatics Championships mein podium finish ke saath, Bhavya ne ye sabit kar diya hai ki wo sach me fast lane mein swimming kar rahi hain.
Indian Swimming News Or International Swimming News Padhne Ke Liye Facebook Par Swimswam Hindi Ko Like Karna Na Bhule:-SwimSwamHindi
