“Paani ek natural healer hai. Swimming aapki soul ko clean karti hai aur body par meditation jaisa asar daalti hai,” 31 saal ke Aman Ghai kehte hain, jo ek international tournament mein apne state aur country ko represent karne ki taiyari kar rahe hain.
Punjab Police mein ASI aur star swimmer Aman Ghai ne India aur abroad mein hui swimming competition mein apni shandaar performance se international level par pehchaan banayi hai.
Last kai saalon mein hundreds of medals aur trophies jeet chuke Aman Ghai ko haal hi mein swimming mein utkrisht khel uplabdhiyon ke liye prestigious Maharaja Ranjit Singh Award se sammanit kiya gaya. Yeh samman unke pichhle 5 saalon ke consistent shandaar performance ko dekhte huye diya gaya hai.
Unki achievements mein 2016 South Asian Championship mein ek gold aur ek silver medal shamil hai. Iske alawa unhone 2013 aur 2015 mein World University Games mein India ko represent kiya. Aman Ghai ne 2023 World Police Games mein 3 gold, 3 silver aur ek bronze medal jeete, jabki 2025 mein United States mein huye World Police Games mein ek gold, 3 silver aur 2 bronze medal apne naam kiye.
Apne career ke shuruaati daur mein bhi unhone inter-university, junior aur national-level competitions mein kai medals jeete.
Punjab Police ke cop aur PAP Jalandhar ki swimming team ke in-charge Amarjit Singh ke bete Aman Ghai ne bachpan se hi swimming mein dilchaspi dikhani shuru kar di thi, kyunki yeh khel unke parivaar ki parampara ka hissa raha hai. Apne pita se inspiration aur strong suport paakar Aman ne swimming ki duniya mein kadam rakha. Unki dedication aur hard work ne unhe jaldi hi sucess dilayi aur 2008 mein unhone apna first Junior National medal jeetkar apne talent ka parichay diya.
Jalandhar ke Police DAV School mein padhai karne wale Aman Ghai ko school ki taraf se strong support mila aur training ke liye state-of-the-art swimming pool ki facility bhi prapt hui. School Nationals aur other competitions mein part lene ke saath-saath, woh har saal lagbhag 3 se 6 mahine Bengaluru mein training bhi karte the. Is dauran unhe apne pita ka constant support aur encouragement milta raha, jisne unke swimming career ko majboot buniyad di.
Aman kehte hain, “Mera first national medal 2008 mein Junior Nationals mein aaya tha. Uske baad 2017-18 tak lagataar medals aur jeet ka silsila chalta raha. Maine Junior aur Senior Nationals ke saath-saath Inter-Varsity tournaments mein bhi represent kiya aur kai feats hasil ki. Mujhe apne school ka poora support mila aur mere pita ne har kadam par mera saath diya. Lagbhag 6 se 7 saal tak main har saal 4 se 6 mahine Bengaluru mein training karta tha. Bengaluru mein swimming ke liye sabse behtareen infrastructure hai. Chahe international star ke swimmers hon ya Punjab Police, Army, Navy aur other teams ke khiladi, sabhi training ke liye wahin jaate hain.”
Aman ne aage kaha, “Meri is successful journey ko possible banane mein mere pita ke atoot sahyog aur mere coaches Lakhvir Singh Kang (Punjab Police) aur Umesh Sharma (Sports College) ki lagataar prerna ka bahut bada yogdaan raha hai.”
2017 mein Punjab Police mein bharti hone ke baad bhi Aman ne apni training aur competition ki taiyari jaari rakhi. Vartamaan mein woh Chandigarh mein rehkar All-India Police Games ki taiyari kar rahe hain. Iske saath hi, February 2027 mein Australia mein hone wale World Police Games ke liye bhi unki training zor-shor se chal rahi hai.
Apne pita se prerna lete hue Aman junior swimmers ko guide karne aur training dene mein bhi sakriya bhumika nibha rahe hain. Punjab Police ke vartamaan aur poorv khiladiyon mein maujood khel pratibha par unhe garv hai.
Apne Olympic sapne ke baare mein baat karte hue Aman ne kaha, “Nishchit roop se Olympic swimming team mein wahi kuch chuninda aur sarvashreshth khiladi jagah bana pate hain. Lekin mujhe vishwas hai ki hamare kshetriya swimming infrastructure mein pichhle kuch saalon mein bahut tezi se sudhaar hua hai. Agar hum aane wali peedhi ko sahi training aur margdarshan dein, to agle das saalon ke andar Punjab se swimming mein ek Olympic vijeta dekhne ko mil sakta hai.”
